Aran, 3 de junh deth 2004
Planvolut alcalde de Vielha, Joan Riu:
Com molt ben deu saber, enguan celebram es 100 ans dera concession deth Prèmi Nobèl de Literatura ath nòste escrivan occitan, Frederic Mistral. Autant nosati, com entitat privada, com d’autes entitats privades e publiques auem amiat o amairam activitats ath torn d’aguest eveniment.
Vivéncia Aranesa optèc, d’ua manèra plan meditada, per impulsar aguesta commemoracion, de forma populara, en tot articular tota ua campanha de marqueting ciutadan, qu’acabarà eth pròplèu mes de deseme.
Er objectiu principau, donc, sonque ère e ei popularizar ar escrivan, difóner eth sòn nòm e promòi er orgulh entre es ciutadans d’Aran de qu’un escrivan occitan – ei a díder un escrivan nòste- age talament de reconeishement. Tanben, mès, a miei e long tèrme, mos auem propausat de difóner era sua òbra literària a trauèrs d’accions populares e damb bèra activitat d’artenhuda mès restringida, entà especialistes dera cultura.
Vos explicam tot açò entà rasonar-vos, pr’amor qu’ètz eth baile deth caplòc d’Aran, quauqu’ues des intervencions publiques qu’auem hèt en Vielha e ena rèsta deth país, ath torn der An Mistral, e coma punt de partença dera justificacion dera demana qu’ara seguida vos hèm.
En nòm dera associacion culturau Vivéncia Aranesa vos hèsqui era següenta demana:
-Atribuïr a un carrèr dera vila de Vielha eth nòm de Frederic Mistral.
Era justificacion d’aguesta demana respon ara impotància d’aguest escrivan en encastre dera literatura occitana –per tant tanben era aranesa-, mès tanben ath sòn caractèr universau, deth quau, era concession deth Prèmi Nobèl n’ei ua mòstra, sense desbrembar era influéncia dirècta qu’aguest escrivan aguec tanben enes nòsti escrivans aranesi e gasconi, autant deth sègle dètz-e-nau coma deth vint.
Frederic Mistral (1839-1914), neishec en Maillane, ua vila provençau qu’aué, entara actuau administracion francesa, ei en Departament de Bouches-du-Rhône ena region Provença-Alps-Còsta d’Azur.
Mos trobam donques, en ua dobla celebracion: per un costat se commemòren es 100 ans dera concession deth Prèmi Nobèl a Mistral e per aute hè 150 ans deth començament deth sòn moviment literari, Lou Felibrige. Pr’amor d’açò, credem qu’ei un bon moment
tà qu’era vila de Vielha rebrembe e aunore a un des sòns escrivans classics, un des nòsti classics.
Ua des formules qu’un equip municipau a entà aunorar a un ciutadan illustre ei atribuïr-li un carrèr. Ei aguesta ua manèra de perpetuar eth nòm der aumenatjat e mantier viua era sua memòria ena vida vidanta des vesins.
En tot demorar qu’era nòsta demana age ua plan bona acuelhuda per part sua e deth consistòri que presidís, èm ara sua disposicion entà ampliar quinsevolha informacion qu’agen de besonh.
Plan coraument,
President dera associacion culturau
“Vivéncia Aranesa: Aula Euròpa des Pirenèus”
Joan-Ramon Colomines-Companys
