diumenge, de maig 30, 2004

AJUDES
AR ESTUDI E ARA CULTURA
“AN FREDERIC MISTRAL”




BASES DETH CONCORS

1.OBJECTIUS DERA CONVOCATÒRIA

Eth Grèmi d’Ostalaria dera Val d’Aran e era Associacion Culturau Vivéncia Aranesa convòquen “Sèt ajudes ar estudi e ara cultura” nomentades “An Frederic Mistral”, pr’amor dera celebracion, enguan, des 100 ans dera concession deth Prèmi Nobèl ar escrivan occitan Frederic Mistral.

Aguestes “Ajudes An Frederic Mistral” son autrejades damb ua finalitat especifica:

-Sies “Ajudes ar estudi” tà subvencionar era matricula enes corsi d’ostiu des VII Jornades Occitanocatalanes 2004, que se celebraràn ena Val d’Aran, entre es dies 19 e 23 de junhsèga. Aguestes Jornades son organizades peth Conselh Generau d’Aran, en encastre dera Universitat d’Ostiu dera Universitat de Lhèida, damb corsi susceptibles d’èster reconeishudi academicament coma crèdits de liura eleccion.

-Ua “Ajuda ara cultura gastronomica” tà subvencionar a un estudiant en trabalhs de recèrca de recèptes occitanes de doci, pòstres e delicatessens, entà dar supòrt ath “Talhèr de creacion” deth futur espectacle public de clausura der “An Frederic Mistral” que se celebrarà en Vielha eth pròplèu mes de deseme, en quau i aurà un “buffet” dubèrt a toti.

2.QUI PÒT PARTICIPAR-I?

Enes “Ajudes ar estudi” i poderàn participar estudiants de quinsevolh centre academic autant deth terrador occitan com de Catalonha, qu’agen formalizat era matriculat en un cors des VII Jornades Occitanocatalanes 2004.

Ena “Ajuda ara cultura gastronomica” i pòt participar quinsevolh persona interessada e damb experiéncia ena gastronomia occitana, sense limit d’edat e de procedéncia.


3.QUÉ CAU HÈR ENTÀ PARTICIPAR-I?


-Entà optar a cadua des Ajudes cau hèr arribar un curriculum vitae deth participant e ua justificacion des motius que botgen a participar ena convocatòria deth concors.

-Es escrits pòden enviar-se en quinsevolh varianta dialectau der occitan, atau com tanben en catalan, espanhòu o en francés.

-En cas des “Ajudes ar estudi” cau especificar que s ‘a formalizat era matricula en un cors des VII Jornades Occitanocatalanes 2004.

-Eth tèrme de liurament dera documentacion ei eth dia 29 de junh entàs “Ajudes ar estudi” e eth dia 11 d’agost entara “Ajuda ara cultura gastronomica”.

-Era documentacion s’a d’enviar via e-mail o pera pòsta tara Associacion Culturau Vivéncia Aranesa: vivenciaaranesa@yahoo.co.uk
Carrèr Pas d’Arró 32, 5au. 1a. 25530 Vielha.

-Un madeish candidat pòt presentar-se simultanèament as dus tipes d’ajudes convocades, mès ac cau hèr damb ua documentacion complèta diferenta, e enviar aguesta per diferent e-mail o trametuda postau.


4.COM SE RESOLVERÀ ETH CONCORS?
-Enes “Ajudes ar estudi”:

S’avalorarà eth camp des estudis corsadi e era sua relacion damb eth coneishement dera realitat aranesa e occitana.
A despiet de que non i a cap de limitacion en çò que hè ath nivèu academic des participants, se priorizaràn es estudiants universitaris.

-Ena “Ajuda ara cultura gastronomica”, se priorizaràn es estudiants e professionaus de quinsevolh centre academic d’ostalaria e restauracion.

-Era resolucion deth concors serà decidida per ua comission designada pes dues entitats convocantes.

-Se harà publica era resolucion des “Ajudes ar estudi” eth dia 30 de junh e era resolucion dera “Ajuda ara cultura gastronomica” eth 12 d’agost d’enguan.

5.ES AJUDES
-Era borsa economica totau d’aguestes “Ajudes An Frederic Mistral”
ei de 1000 €, en tot atribuïr-se, en concrèt, as participants:

Sies cents € en “Ajudes ar estudi”, repartidi segontes besonhs de matricula deth cors escuelhut.
Dus cents € en “Ajuda ara cultura gastronomica”.



Aran, mai deth 2004


Gremi d'Ostalaria dera Val d'Aran
Associacion culturau VIVÉNCIA ARANESA